ئاپتونوم رايون يېقىندا بۇ يىل ئوتتۇرا – باشلانغۇچ مەكتەپلەردىكى خەتەرلىك ئۆيلەرنى ئومۇميۈزلۈك چېقىپ تاشلاش، يېزا مەجبۇرىيەت مائارىپى باسقۇچىدىكى ئوتتۇرا – باشلانغۇچ مەكتەپلەرنىڭ ئوقۇتۇش شارائىتىنى ئۈزۈل – كېسىل ياخشىلاش ئۈچۈن، 660 مىليون يۈەن مەخسۇس مەبلەغ سېلىشنى قارار قىلدى. بۇ ئۆزگەرتىش قۇرۇلۇشى بۇ يىل 7 – ئايدىن بۇرۇن تاماملىنىدىكەن. ھازىر ئاپتونوم رايونىمىزدا مەجبۇرىيەت مائارىپى باسقۇچىدىكى ئوتتۇرا – باشلانغۇچ مەكتەپلەردىكى خەتەرلىك ئۆيلەرنىڭ كۆلىمى 663 مىڭ كۋادرات مېتىر كېلىدىكەن.
ئاپتونوم رايوننىڭ بىر تۇتاش ئورۇنلاشتۇرۇشى بويىچە، جايلاردىن ئوتتۇرا – باشلانغۇچ مەكتەپلەردىكى خەتەرلىك ئۆيلەرنى چېقىپ تاشلاشتا پارتكوم، خەلق ھۆكۈمىتىنىڭ ‹‹بىرىنچى قول›› رەھبىرى مەسئۇل بولۇش تۈزۈمىنى يۈرگۈزۈش تەلەپ قىلىندى ھەم مەخسۇس تۈر مەبلىغى بىلەن قەرز قايتۇرۇشقا رۇخسەت قىلىنمايدۇ، تۈر قۇرۇلۇشى مەجبۇرىيەت مائارىپى باسقۇچىدىكى مەكتەپلەرگىلا ئىشلىتىلىدۇ، تولۇق ئوتتۇرا مەكتەپ باسقۇچىدىكى مەكتەپ قۇرۇلۇشىغا ئىشلىتىلمەيدۇ، دەپ ئېنىق بەلگىلىمە چىقىرىلدى. يەنە جايلاردىن ئۆز جايىنىڭ شارائىتىغا ئاساسەن، ‹‹پۇختا، ئەمەلىي، يېتەرلىك بولۇش، ئوقۇغۇچىلارنىڭ تۇرمۇشى ۋە ئۆگىنىشىگە قۇلايلىق بولۇش›› پرىنسىپىنى چىقىش قىلىپ، يېڭىدىن سېلىنىدىغان مەكتەپ ياتاقلىرىنىڭ يەر تەۋرەشكە چىداملىق بولۇشىغا كاپالەتلىك قىلىشىنى تەلەپ قىلدى.
قۇرۇلۇش سۈپىتىگە كاپالەتلىك قىلىش ئۈچۈن، قۇرۇلۇش سۈپىتىدە ‹‹مەسئۇلىيىتىنى سۈرۈشتۈرۈش تۈزۈمى›› ۋە قۇرۇلۇشنى ھۆددىگە ئالغۇچى ئورۇن مەمۇرىي ئىجازەت تۈزۈمى ئىجرا قىلىنىدۇ، جەمئىيەتكە بارلىق تۈر ئاشكارىلىنىدۇ ھەم قۇرۇلۇش ئىش ئورنىدا قۇرۇلۇش ئېلان تاختىسى تەسىس قىلىنىپ، جامائەتچىلىكنىڭ نازارىتىنى قوبۇل قىلىپ، كۆپۈك قۇرۇلۇش قىلىشقا، قەرز ئېلىپ قۇرۇلۇش قىلىشقا قەتئىي يول قويۇلمايدۇ ھەم ئاپتونوم رايونلۇق مائارىپ نازارىتى، مالىيە نازارىتىدىن تۈرلەرنى قاراپ چىقىش گۇرۇپپىسى تەشكىللىنىپ، تۈر يولغا قويۇشتا ناھىيە، شەھەرلەر مەكتەپ قۇرۇلۇشى قىلىش سەۋەبىنى ئۆزى چۈشەندۈرۈش، مۇتەخەسسىسلەر تەكلىپ – پىكىر بېرىش، ئىككى تەرەپ ئورتاق كېڭىشىش ئۇسۇلى قوللىنىلىپ، ناھىيە(شەھەر)لەرنىڭ شتاتى ھەم ۋىلايەت(ئوبلاست) دەسلەپتە قاراپ چىققان تۈر قۇرۇلۇشى پىلانى تەپسىلىي قاراپ چىقىلىدۇ.
ھازىر ئاپتونوم رايون تۈركۈم بويىچە يەر قۇرۇلۇشى پىلانىنى چۈشۈردى ھەم جايلاردىن مەبلەغ سېلىش پىلانى ۋە مەخسۇس تۈر مەبلىغىنى ۋاقتىدا چۈشۈرۈپ، قۇرۇلۇشنىڭ ئالدىنقى باسقۇچلۇق تەييارلىق خىزمىتىنى ياخشى ئىشلەشنى تەلەپ قىلدى. شۇنىڭ بىلەن بىللە، تۈر قۇرۇلۇشىنى باشلاش ۋاقتى، قۇرۇلۇشنى تاماملاش ۋاقتىنى بېكىتىپ، خىزمەت مەسئۇلىيىتىنى كونكرېت ئورۇن ۋە شەخسلەرگىچە ئەمەلىيلەشتۈرۈپ، قۇرۇلۇشنىڭ 7 – ئايدىن ئىلگىرى تاماملىنىشىغا كاپالەتلىك قىلىشنى تەلەپ قىلدى. قۇرۇلۇش ئۆز قەرەلىدە تاماملانمىسا، يەرلىك ھۆكۈمەتنىڭ ئاساسلىق مەسئۇلى، شۇ تۈرنىڭ مەسئۇلى ۋە ئالاقىدار خادىملارنىڭ مەسئۇلىيىتى سۈرۈشتۈرۈلىدۇ.
