پۈتۈن دۇنيا كۆز تىككەن كاتتا مۇسابىقە __ ئىسپانىيە خان جەمەتى مادرىد كوماندىسى بىلەن بارسېلونا كوماندىسى ئوتتۇرىسىدىكى 236-نۆۋەتلىك <ئەسىر ئۇرۇشى> تۈنۈگۈن كەچ مادرىدتىكى سانتىياگو بېرنائۇ مەيدانىدا ئۆتكۈزۈلدى . نەتىجىدە بارسېلونا مېسسى ۋە پېدرونىڭ ئىككى توپىغا تايىنىپ 2-0 نەتىجە بىلەن ساھىبخان خانلىق مادرىدنى مەغلۇب قىلىپ ، ئۇدا 6-مەيدان ئۇتۇقنى قولغا كەلتۈرۈش بىلەن بىر ۋاقىتتا قارشى تەرەپنىڭ 12 مەيدان ئۇدا ئۇتۇش ھالىتىنى ئاخىرلاشتۇردى .

مەزكۇر مۇسابىقە بۇ يىللىق ئىسپانىيە پۇتبول بىرلەشمە مۇسابىقىسىنىڭ 31-ئايلانمىسى (كەينىدىن سانىغاندا 7-ئايلانما) بولۇپ ، مۇسابىقىدىن بۇرۇن ئىككى كوماندا ئوخشاشلا 77 نومۇر بىلەن بىرلەشمە مۇسابىقىدە 1-ئورۇندا تۇرۇپ كېلىۋاتقان ، نەتىجىدە بارسېلونا بۈگۈنكى غەلىبە ئارقىلىق خانلىق مادرىدتىن ئۈچ نومۇر ئېشىپ كەتكەندىن باشقا يەنە ئۇدا ئىككى يىل ئەشەددىي رەقىبىنى قوش ئۇتۇپ (بىر يىلدا مېھمان-ساھىبخان بولۇپ ئىككى مەيدان مۇسابىقىلىشىدۇ) ئاستانىنىڭ ھەيۋىسىنى يەرگە ئۇردى .

ئۇندىن باشقا يەنە بۇ مۇسابىقىنى 85 مىڭ ئادەم نەق مەيدانغا كىرىپ كۆرگەن بولۇپ ، سۈنئىي ھەمرا ئارقىلىق بىۋاستە تارقىتىلغان دائىرە 188 دۆلەتتىكى 300 مىليوندىن ئارتۇق نوپۇسنى قاپلىغان . ئىككى كوماندىدىن مەيدانغا چىققان 22 ئادەمنىڭ توختام ئومۇمىي باھاسى بىر مىليارد ياۋروغا يەتكەن ~!